Последования молебные во избавление от духов нечистых — Петр Могила

Последования молебные во избавление от духов нечистых

 

Петр Могила

 

Канон молебный ко Господу нашему Иисусу Христу, ко пресятей Богородице, ко безплотным, ко апостолом, и всем святым, о избавлении недужного от обуревания бесовского. Глас 2


(данный канон перепечатан кириллицей с церковно-славянского из книги «Последования молебныя об избавлении от духов нечистых», которая используется в Православной Церкви для вычитки, т.е. экзорцизмов. Следует учесть, что в церковно-славянском языке все слова как написаны, так и читается, и то, что в данном языке нет буквы «ё», а всегда читается «е».)


Песнь 1


Ирмос: Грядите людие, поим песнь Христу Богу, раздельшему море и наставльшему люди, яже изведе из работы египетския, яко прославися.


Припев: Избави от бед, Спасе, раба Твоего (или, рабу Твою), яко Милосерд.

Творче и Избавителю мой и Господи, верных помоще, ускори, избави мя от настоящия беды, раб Твой (или, раба Твоя) вопиет Тебе, Едине Человеколюбче.

Наше Един ведый неможение, от настоящия скорби и содержания пагубны предварив исхити, и спаси Спасе раба Твоего (или, рабу Твою).


Слава: Ангельстии чинове невещественных сил, со апостолы и мученики, умолите всех Владыку, от беды тяжчайшия избавити раба Твоего (или, рабу Твою).

И ныне: Верных прибежище Приснодево, державная помоще нас рабов твоих, настоящия нужды раба твоего (или, рабу твою) молитвами избави Владычице.


И по сей и по коегождо песни поют катавасию:


Избави от бед раба Твоего ( или, рабу Твою) Многомилостиве, яко мы усердно к Тебе прибегаем, Милостивому Избавителю, всех Владыце, Господу Иисусу.


И другую к Богородице.


Спаси от бед раба твоего (или, рабу твою), Богородице, яко вси по Бозе к тебе прибегаем, яко нерушимей стене и предстательству.


Песнь 3


Ирмос: Утверди нас в Тебе Господи, древом умервщвлей грех, и страх Твой всади в сердца нас поющих Тя.

Припев: Избави от бед, Спасе, раба Твоего (или, рабу Твою), яко милосерд.

Якоже древле Иакова, Твоего угодника, избавил еси Исавова навождения, тако избави и раба Твоего (или, рабу Твою) от настоящия нужды, яко человеколюбец.

Человеколюбче Спасе, призываю Тя в скорби сый и печали, не презри мя раба Твоего: но потщися, и избави мя, яко Благоутробен.

Слава: Едине Блаже, Едине Благоутробне, Едине Щедре и Милостиве, молитвами святых Твоих, Твоего раба (или, Твою рабу) ущедрив свободи.

И ныне: Бога, Егоже родила еси Чистая, моли со всеми ангелами и апостолы, со пророки же и мученики от бед раба твоего (или, рабу твою) избавити.


Отпевше же катавасию, заклинатель, аще священник есть, глаголет ектению сию:


Помилуй нас, Боже, по велицей милости Твоей, молимтися, услыши и помилуй.

Предстоящии же: Господи помилуй (трижды)

Священник: Еще молимся Господу Богу нашему, о еже услышати глас молитвы нашея, и пощадити и помиловати раба Своего (или, рабу Свою), и показати на нем (или, на ней) великую Свою милость, и отврати всякий гнев Свой, праведно движимый нань (или, на ню), простити ему (или, ей) все множество согрешений, и избавити его (или, ю) от всякого обстояния и озлобления, насилия, насилия же и мучительства лукавого диавола, и прогнати от него (или, от нея) вселестное сатанинское мечтание, привидение же и страхования, и всю его мучительную силу обдержащую его (или, ю), здравие же душевное и телесное скоро подати ему (или, ей) благостию Твоею, и помиловати его (или, ю) и нас всех, рцем вси: Господи услыши и помилуй.

Предстоящии же поют со умилением:

Господи помилуй (40 раз)

Священник возглашает: Услыши ны, Боже Спасителю наш, упование всех концев земли: Предстоящии: Аминь.

Седален: Глас 2
Посли скоро силу Твою Христе Боже, в помощь и заступление рабу твоему (или, рабе Твоей), зле от насилия диаволя бедствующему (или, бедствующей), и вселукавое его действо скоро иждени от него, цела же и здрава сотвори, ты бо Сам Един еси вскоре заступаяй.

Слава, и ныне:

Моление теплое, и стена необоримая, милости источниче, мирови прибежище, прилежно вопием ти: Богородице Владычице, предвари и от бед избави раба твоего (или, рабу твою), едине вскоре предстательствующая.


Песнь 4


Ирмос: Пришел еси от девы, не ходатай ни ангел, но Сам Господь воплощся, и спасл еси всего мя человека. Тем зову Ти:слава силе Твоей Господи.

Припев: Избави от бед, Спасе, раба Твоего (или, рабу Твою), яко Милосерд.

Бурею бед люде колеблемаго Твоего раба (или, рабу Твою), Владыко, и пучиною скорбей ныне обуреваемого (или, обуреваемою), к тишайшему пристанищю настави.

Оскорбляющии Твоего раба (или, Твою рабу), Христе, умножишися, и язык изостриша якоже обоюду острый меч: виждь убо Человеколюбче, и от неправедныя смерти избави Твоего раба (или, Твою рабу).

Слава: Архангели, Власи, Силы и Ангели, апостолы, мученицы, преподобнии, пророцы, и праведнии, вси молитеся о ныне всеокаяннобедствующем (или, бедствующей).

И ныне: Всепетая человеком готовая помоще, дивия волнения искушений укроти, и под кров твой прибегающего раба твоего (или, рабу твою) спаси Владычице.


Песнь 5.


Ирмос: Света Подателю и веков Творче Господи, во свете Твоих повелений настави нас: разве бо Тебе иного бога не знаем

Припев: Избави от бед, Спасе, раба Твоего (или, рабу Твою), яко Милосерд.

Езекиины иногда молитвы исполнивый Господи, и мою исполни вскоре Едине Блаже, и спаси раба Твоего (или, рабу Твою) от всякого озлобления.

Ангельскими руками, верховного ученика Господи, из темницы божественною силою иногда изведый, избави Твоего раба (или, Твою рабу), люте бедствующа (или, бедствующу).

Слава: Ангельския воинства, апостолов, пророков, собор же всеславных мученик, преподобных, о сущем (или, сущей) в лютых, купно молитву сотворите.

И ныне: Мати Христа Бога, ускори избавити верногораба твоего (или, верную рабу твою) от лютыя нужды и беды ныне нашедшия, да тя славит сердцем и усты.

 

Песнь 6.



Ирмос: В бездне греховней валяяся, неизследимую милосердия Твоего призываю бездну: от тли Боже мя возведи.

Припев: Избави от бед, Спасе, раба Твоего (или, рабу Твою), яко милосерд.

Китова чрева избавивый древле пророка Твоего Владыко Господи, и Твоего раба (или, Твою рабу) избави, да верою и любовию славит Тя.

Даниила якоже избавил еси от львов Христе, избави от бесов лукавых ныне и мене Твоего раба (или, Твою рабу), Владыко, и от истления и смерти возведи.

Слава: Бедствующа (или, бедствующу) спаси раба Твоего (или, рабу Твою), Спасе, святых ангел молитвами, пророков, мучеников же и премудрых учеников Твоих моленми.

И ныне: Не презри люте обуреваемого (или, обуреваемую), и недоумением одержимаго (или, одержимую), Отроковице, твоего раба (или, твою рабу), но обычне избави прибегающаго (или, прибегающую), под кров твой, Пречистая.


По катавасии же, глаголет священник ектинию:


Паки и паки миром Господу помолимся.

Предстоящии: Господи помилуй:

Священник: О избавлении и освобождении раба Его (или, рабыни Его), имярек, от насилия и обстояния диавольского, и вселукавого его коварства.

Предстоящии: Господи помилуй.

Священник: Заступи, спаси, помилуй и сохрани его (или, ю) и нас Боже Твоею благодатию.

Предстоящии: Господи помилуй.

Священник: Пресвятую, Пречистую, Преблагословенную:

Предстоящии: Тебе Господи.

Священник: Яко Ты еси Царь Мира:

Предстоящии: Аминь.


Кондак, глас 6.



Не имамы иныя державнейшия помощи, не имамы иныя известнейшия надежды, разве Тебе Христе Боже наш, в Него же веруем и Имже хвалимся: Ты убо нам помози, и от всякого обстояния скоро избави, Твои бо есмы рабы, да не постыдимся.

Другий кондак, глас тойже:

Предстательство христиан непостыдное, ходатайство ко Творцу непреложное, не презри грешных молений гласы, но предвари яко благая на помощь нас, верно зовущих ти: ускори на молитву, и потщися на умоление: предстательствующи присно, Богородице чтущих тя.

Посем священник глаголет: Вонмем, мир всем.

Предстоящии: И духови твоему.

Священник: Премудрость вонмем. Прокимен, глас 6: Боже, в помощь мою вонми, Господи, помощи ми потщися. Стих: Да возвратятся вспять и постыдятся мыслящии мне злая.

Священник: Господу помолимся.

Предстоящии: Господи помилуй.

Священник: Яко Свят еси, Боже наш, и во святых почиваещи, и Тебе славу возсылаем, Отцу, и Сыну, и Святому Духу, ныне и присно, и во веки веков.

Предстоящии: Аминь.

Священник: Всякое дыхание да хвалит Господа. Стих: Хвалите Бога во святых Его, хвалите Его во утвержении Силы Его.

Священник же: И о сподобитеся нам слышанию Святаго Евангелия Господа Бога молим.

Предстоящии: Господи помилуй, трижды.

Священник: Премудрость, прости, услышим Святаго Евангелия. Мир всем.

Предстоящии: И духови твоему.

Священник: От Марка Святаго Евангелие чтение.

Предстоящии: Слава Тебе Господи, слава Тебе.

Священник: Вонмем.

Священник же заклинаяй крепко повелев держати беснаго, над главою его книгу держа, чтет Евангелие от Марка: глава 16, зачало 71, от полу:

Во время оно, воскрес Иисус от мертвыйх, явися учеником своим, возлежащим им единонадесяте, и поноси неверствию их, и жестосердию, яко видевшим Его воставша, не яша веры. И речи им: шедше в мир весь проповедите Евангелие всей твари. Иже веру иметь и крестится, спасен будет: а иже не иметь веры, осужден будет. Знамения же веровавшим сия последуют: именем моим бесы ижденут. (Словеса же сия чтый заклинатель, десницею прикасается главы беснаго). Языки возглаголют новы: Змия возмуть: аще и что смертно испиют, не вредит их: на недужныя руки возложат, и здрави будут (Сие же чтый, поддержащу единому от клирик книгу, заклинатель руце обе возлагает на главу беснаго, и чтет прочая Святая Евангелия) Господь же убо по глаголании Его к ним, вознесеся на Небо, и седе одесную Бога. Они же изшедше проповедаша всюду, Господу поспешествующу, и слово утверждающу последствующими знаменьми, аминь.

Предстоящии поют: Слава Тебе, Господи, слава Тебе.

Заклинатель же дает бесному лобзати Святое Евангелие, и взем священную воду кропит беснаго крестообразно, глаголя:

Во имя Безначального, Несозданного, и Нерожденного, Отца +

Второе же глаголя:

И Единородного, Единосущнаго, и Собезначальнаго Сына Его, Господа нашего Иисуса Христа +

И паки третие кропит, глаголя:

И Духа Святао Животворящяго, от Отца исходящагоЮ Бога Единаго в Троице Святей Славимого и Покланяемого +

Аминь.

Предстоящии же абие поют:

Слава: Отче, Слове, и Душе: Троице Святая, очисти множество согрешений наших. И ныне: Молитвами Пресвятыя Богородицы, Милостиве, очисти множество прегрешений наших.

И абие поют стихиру, глас 6:

Не остави раба Твоего (или, рабу Твою) в человеческое заступление, Пребезначальная Троице: но приими яко Владыка моление нас рабов Твоих, скорби бо обдержат его (или, ю), терпети не может бесовскаго насилия, и лютаго его обстояния: покрова не сстяжал есть нигдеже прибегнути, страстьми всегда побеждаемый (или, побеждаемая), утешения не имать иного разве Тебе Творче Мира, Упование и Спасиние верных: не презри моления наша, но совершенна сотвори.

По стихире же, абие заклинатель аще священник есть, сам глаголет великую ектинию. Аще же не священник есть, то един от предстоящих священников, изрядне же священнодействовавый Божественную службу, да глаголет ектению великую.


Спаси, Боже, люди Твоя, и благослови достояние Твое, посети мир Твой милостию и щедротами, возвыси рог христиан православных и умири Церковь Твою Святую, и низложи враги наша: мир и Любовь всем, иже во власти суть, всегда подавай, всем же верным рабом Твоим единомыслие и согласие в вере даруй, и низпосли на ны и на вся христоимениныя люди Твоя милости Твоя богатыя: и сего предстоящаго раба Твоего (или, рабу Твою), имярек, во образ и подобие Твое созданнаго (или, созданную), и Всечестною Кровию Сына Твоего искупленнаго (или, искупленную), от насилия и мучения диаволя свободи, и истинное поболение о своих гресех показати, и плоды достойны покаяния сотворити, и от Тебе оставление тех прияти сподоби. Нас же недостойных рабов Твоих, о о свобождении его (или, ея), труждающихся услыши, и помощь Твою всесильную нам низпосли, прилежно и смиренно молимся: Силою Честнаго и Животворящаго Креста: молитвами и молением Пречистыя Владычицы нашея Богородицы и Приснодевы Марии: заступлением и молитвами честных великих чиноначальник и архистратиг Михаила, Гавриила, Рафаила, Уриила, и прочих всех святых небесных сил безплотных: честнаго и славного пророка предтечи, и крестителя Иоанна: святых славных и всехвальных апостолов Петра и Павла, Андрея, Иакова, Иоанна, Филиппа, Варфоломея, Фомы, Матфея, Марка, Луки, Варнавы, и всех святых, апостолов и семидесяти учеников Христовых: святых и добропобедных мучеников Стефана, Георгия, Димитрия, Прокопия, Киприана, Кира, Иоанна, Пантелеймона, Иоанна Нового иже в Сочаве: святых страстотерпцев Киевских князей Бориса и Глеба, и всех святых мучеников и исповедников: святых мучениц Феклы, Екатерины, Варвары, Марины, Ефимии, Иустины, и всех святых мучениц: святых иерархов и учителей вселенских, Василия Великаго, Григория Богослова, Иоанна Златоустаго, Афанасия, Кирилла и другаго Кирилла, Григория Нисскаго, Епифаниа, и всех святых учителей вселенских: святых иерархов Николая Мирликийскаго, Григория Неокесарийскаго и Григория Арменскаго Чудотворцев: святых митрополитов Петра, Алексия, Ионы, Филиппа и Ермогена Московских, и всех святых иерархов: преподобных и богоносных отец наших Антония Великаго, Павла Фивейскаго, Саввы Освященного, Марка Фраческаго Афинскаго, и преподобных отец наших Печерских, Антония и Феодосия, и их учеников и спостников, Иоанна Многострадального, Исаакия и Марка, Печерских, Никона и Прохора Чудотворцев, Сергия Радонежского и Серафима Саровского, Иова Почаевского и всех святых преподобных пустыников, и иноков: святых и праведных богоотец Иоакима и Анны, и всех святых мужей, девиц же и благочестно Тебе послуживших жен, молим Тя, Многомилостиве Господи, услыши нас грешных молящихся Тебе и помилуй нас.

Предстоящии же умильно тихим гласом поют: Господи помилуй (12 раз)


Заклинатель возглашает: Милостию и Щедротами и Человеколюбием Единороднаго Твоего Сына:


Песнь 7.


Ирмос: Телу златому премудрыя дети не послужиша, и в пламень сами поидоша, и боги их обругаша, среди пламени возопиша, и ороси я ангел: услышася уже уств ваших молитва.


Припев: Избави от бед, Спасе, раба Твоего (или, рабу Твою), яко милосерд.

Якоже древле триех отроков от пещи огненныя избавил еси, избави Щедре раба Твоего (или, рабу Твою), яко Благ, молим Тя, находящия нужды и жжения, Владыко, нестерпимых искушений, яко да славят Тя.


Едине ведый немощь, Христе, человеческую, показавый в скорбех утешения Человеколюбче, избави настоящия беды и раба Твоего (или, рабу Твою), поющаго (ил, поющую): Благословен Бог отец наших.


Слава: Ангелов множество, апостолов, пророков, мучеников божественных, и праотец божественное собрание, Благаго молите ныне, плачь обратити в радость взывающаго (или, взывающия): Благословен еси Боже отец наших.


И ныне: Едина надеждо и помоще верных Богородительнице, потщися, помози рабу твоему (или, рабе твоей), обуреваемому (или, обуреваемей) скорбьми отовсюду, и недоумевающему (или, недоумевающей), и в болезни сущему (или, сущей), и к тебе прибегающему (или, прибегающей) в надежде душевной.


Песнь 8.


Ирмос: В пещь огненную ко отроком еврейским Снизшедшаго, пламень в росу Преложшаго Бога пойте, дела, яко Господа, и превозносите во вся веки.

Припев: Избави от бед, Спасе, раба Твоего (или, рабу Твою), яко Милосерд.


Павла и Силы молитвы якоже приял еси, и от уз тех избавил еси: и нас Милостиве недостойных ныне вопиющих гласы услыши, и избави раба Твоего (или, рабу Твою), от тления же и смерти.

Не отврати от мене раба Твоего (или, рабуы Твоея), Христе, Лице Твое, яко скорблю, скоро услышим я Спасе, и избави настоящия бури: нами вопиет Тебе раб Твой (или, раба Твоя), Щедре.

Слава: МолитвамиБоже, невещественных служителей и апостолов, и мученик ликов, и священных пророков, преподобных, и праведных всех, избави Твоего раба (или, Твою рабу) от лютыя беды.

И ныне: Прибежище христиан, помощнице в лютых обуреваемым Всесвятая Дево, не презри твоего раба (или, твою рабу) бедами потопляемого (или, потопляемую), и державному твоему прибегающаго (или, прибегающую) ныне покрову.



Песнь 9.



Ирмос: От Бога Бога Слова, неизреченною мудростию Пришедшаго обновити Адама, ядию в тление падшаго люте, от Святыя Девы неизреченно Воплотившагося нас ради, вернии единомудренно песньми величаем.

Припев: Избави от бед, Спасе, раба Твоего (или, рабу Твою), яко Милосерд.

Скорбная Твоего раба (или, Твоея рабы), настоящия беды, обуревание многое и лютое претвори Владыко, и преврати сего (или, сея) плачь в радость всегдашнюю: да верою и любовию непрестанно величает Тя.

Твоего многаго благоутробия да не победит Щедре, множество безмерных моих зол, но обычною Твоею милостию, нами Тебе взывает раб Твой (или, раба Твоя), спаси, и избави мя Христе от вреда всяческого, Едине Многомилостиве.

Слава: Пощади мене Господи, пощади, егда судити имаши, и не осуди мене во огнь, ни яростию Твоею обличи мене, молит Тя Дева Тебе рождшая Христе, ангел множество, и мучеников собрание.

И ныне: Пресвятая Дево, со безплотными служителями, и святыми ангелы, апостолы, пророки, мученики, и преподобными всеми, Единого Преблагаго Бога молите, избавитися от озлобления рабу твоему (или, рабе твоей).

Посем абие поют вси со умилением:
Достойно есть:

Преуготовлену убо сущу якоже преднаписася, заклинателю, поелику мощно во всем пред Божественною литургиею: повелев на земли ниц припасти бесному, и прилежно молитися. Аще есть священник,сам Божественную совершает литургию: аще ли ни, то иный священник сый да совершает, прилежно Бога моля еже благодатию Своею поспешити делу намерения его. В проскомисании убода принесет часть о недужном, глаголя молитву сию:

Господи Иисусе Христе Боже наш, вольною Твоею Страстию, и Животворящею смертию, всю силу диаволю упразднивый, и державу его разрушивый, род же человеческий от мучительства его свободивый, и верныя люди Себе присвоивый, приими жертву сию Тебе о рабе Твоем (или, орабе Твоей) имярек, мною недостойным рабом Твоим приносимую, и иждени от него (или, от нея), прилежно молимся, вселукавое диавольское действио, и невредима его (или, ю) от всякого мечтания и насилия демонского всегда соблюди. Ты бо еси Избавитель, Врач же, и Посетитель душ и телес наших, и Твоя есть Слава во веки. Аминь.

По изрядном же прочтет молитву обычную, на конце ея да глаголет:

Господи Боже наш, молимся Твоему человеколюбию, и прилежно просим, благодарне от нас приими смиренно Тебе приносимый дар и мольбу, и словесную службу о рабе Твоем (или, рабе Твоей), имярек, и благоутробне сего (или, сию) от насилия лукавого врага лести, и от всякого его наваждения, мучения и державы изми, и свободна (или, свободну) покажи. Ты бое си Бог наш, и Спас душам нашим, и Тебе славу возсылаем со Единородным Твоим Сыном, и Пресвятым Духом во веки. Аминь.

По Причащении же Божественных Таин, аще сам заклинатель священнодействует, по обычной молитве благодарной, да глаголет и сие:

Тело Твое Пресвятое, Господи Иисусе Христе Боже наш, и Кровь Твоя Всечестная, Имиже Причаститися нам человеколюбне Изволил еси, да будет нам во оставление грехови в живот вечный, в крепость же и во всеоружество на всю силу диаволю, и в победное одоление и конечное изгнание всего действа его от раба Твоего (или, от рабы Твоея) имярек, от него насильствуемаго (или, насильствуемыя). Яко Ты еси Крепость, Сила, и Утверждение наше, и Тебе славу возсылаем со Безначальным Твоим Отцем, и Пресвятым и Благим и Животворящим Твоим Духом, ныне и присно, и во веки веков.

Аминь.

Аще же не сам заклинатель служит священник служай глаголет сию молитву:

Господи Иисусе Христе Боже наш, сподобивый мое недостоинство многаго ради милосердия Твоего принести Тебе ныне сию спасительную Безкровную Жертву, и причаститеся Пречистым и Животворящим Твоим Тайнам: моля Тя прилежно, Единого Благаго и Человеколюбивогои Всесильного Бога, предстани ныне в помощь рабу Твоему, егоже избрал еси в служение сие, еже наступати на змия и скорпия, и на всю силу вражию, и подаждь ему силу, и крепость, еже возмощи крепко сопротивитися всякой силе вражией, и о Имени Твоем изгонити возмощи ему державно все диаволе насилие, насильствующее рабу Твоему (или, рабе Твоей) имярек, Ей, Господи Боже наш, да не посрамлен изыдет уповаяй на милость Твою, и на силу Державы Твоея надеяйся, но победоносец да явится о Твоей державе и Всесильной Крепости. Твое бо есть еже миловати и спасати нас, Боже наш, и Тебе славу возсылаем, со Безначальным Твоим Отцем, и со Святым Духом во веки.
Аминь.

По литургии же Божественной, аще сам заклинатель священнодействовал есть, да не слагает с себе священныя одежды, но одеян во вся да совершает последование заклинания. Аще же не сам священнодействова, и аще священник есть, да возложит на себе епитрахиль и фелонь: аще же от меньших чинов есть, в стихарь: аще же есть диакон, или иподиакон: аще же от низших, в краткий да облачится фелонь, сице яко да своего сана и чина не лишится одежды. Обращься же к беснующемуся и ко предстоящим, да творит к ним в кратце предсловие поучительное, во еже и о предлежащем деле научится им, и к теплоте молитв возбуждатися. Скончав же сие, абие велиим смирением и благоговением, аще священник есть, пред Святою Трапезою во Олтари, отверзит Царская Врата: аще же от меньших чинов, вне Олтаря пред Святыми Враты пад ниц на лицы своем, со умилением и слезами чтет Псалом 50 «Помилуй мя Боже»: до конца. Сие же творят и  предстоящии.

По скончании же Псалма, на коленех стоя чтет сию молтву со всяким умилением:

Господи Иисусе Христе Боже наш, из Безначального и Сопресносущнаго Твоего Отца, безлетно превечне рожденне неизреченно, и в последняя лета от Пречистыя Девы Марии, спасения ради человеческаго непреложно Вочеловечивыйся, смиренно пред Твоим Величеством колене души и тела моего преклонь, рабски молюся, посли благодать Твою всечистительную и  просвещающую, и вся ми омый скверны и просвети ми смысл, и руку Твою Державную и Крепкую, с высоты жилища Твоего простри, и осени над главою моею в день брани в день брани сея, и укрепи мя на предлежащее дело, силу и крепость яже от Тебе мне даруя, на побеждение и изгнание всякия диавольския силы, рабу Твоему (или, рабе Твоей) имярек, насильствующия, Тебе бо явленны суть страсти моя, и немощь естества человеческаго, и крепость супостата и врага нашего изверга же Твоего лукавого диавола: Ты Сам Владыко веси яко естество наше есть страстно, и сила немощна, и без Тебе Бога и Спаса нашего, якоже ничтоже есьмы, сице и без Твоея помощи ничтоже успети можем. От Тебе убо давшаго власть рабом Своим еже наступати на змия и скорпия, и на всю силу вражию, и еже о Имени Твоем изгоняти лукавыя духи, яко от Всемогущаго Владыки и Всесильнаго Воеводы, крепость, силу же, и помощь просим: и убо яко да Тобою нам Человеколюбне данная сия власть грехами моими не возбранена будет, действительна в настоящем деле быти: паки и паки смиренно рабски молюся. Но мною яко Своим, аще и недостойным орудием покажи Силу Свою Великую и Крепкую ныне. Ей Господи Боже наш, да не посрамлен от Тебе изыду, ниже да возрадуется враг душ наших о немощи моей, но Силою и Действом Твоего Пресвятаго, Великолепаго, Страшного, и Покланяемого Имени, и Твоего Безначального, и Превечнаго Единоестественнаго Отца, и Срасленнаго (т.е. Соестественного) и Единосущнаго, и Сопрестольного Животворящаго Твоего Духа, с Ними же Един по Существу Бог Сый над всеми Царствуеши, да изгнан будет и побежден враг супостат и мучитель естества нашего, Твой же сопротивник всегордый диавол, и в бегство да обратится, и абие вскоре со всею лукавоковарною силою своею да изыдет, и да исчезнет от раба Твоего сего (или, рабы Твоея сея) имярек, и от места сего, и к тому во веки да не возвратится вспять. Твое бо есть Царство, Сила же, и Держава, и Тебе славит вся тварь во веки.

Аминь.

Востав же абие со дерзновением многим и крепкою верою, ограждаяся трижды Крестным Знамением, глаголет:

Во Имя Отца, и Сына, и Святаго Духа.

Аминь.

Потом же сие:

Господи Иисусе Христе Сыне Божий, помилуй мя грешнаго.

Боже, милостив буди мне грешному.

Боже, в помощь мою вонми, Господи, помощи ми потщися.

И начинает обычная.

(На данном мы заканчивает, продолжение будет в следующих обновлениях сайта).

Благословенно Царство Отца, и Сына, и Святаго Духа, ныне и присно, и во веки веков.

Предстоящии же клирицы отвещавают: Аминь. Сам же заклинатель чтет со умилением и всяким вниманием, ничтоже борзяся, вся последующая по чину, начен от зде:

Слава Тебе, Боже наш, слава Тебе. Царю небесный: Трисвятое. Отче наш: Яко Твое есть Царство: Господи помилуй, 12. Слава, и ныне: Приидите поклонимся: трижды. И абие псалом 142. Господи услыши молитву мою: и псалом 22. Господь пасет мя, и ничтоже мя лишит: и псалом 26. Господь просвещение мое и Спаситель мой: Слава Отцу, и Сыну, и Святому Духу. Предстоящии же священницы, или прочии от священного чина ту сущии глаголют: И ныне и присно, и во веки веков, аминь. Аллилуиа, аллилуиа, аллилуиа, слава Тебе Боже, трижды.

Абие же заклинатель со всяким благоговением и вниманием, глаголет сия молитвы.

Молитва с поклонением ко Пресвятей Троице 1.

Поклоняемся Тебе, Пресвятая Троице, Единосущная, Животворящая, и Неразделимая, Отче, и Сыне, и Святый Душе, Истинный Единый Боже, и Творче мой: верую в Тя, исповедую, славлю, благословляю, благодарю, хвалю, почитаю, превозношу, и смиренно молю Тя, помилуй мя непотребнаго и недостойного раба Твоего: и от озлобления диавольского избави создание Твое сие.

Ко Пресвятей Богородице. 2.

Величаю тя, Пресвятая Дево Богородице, возвеличившую род наш, и блажу тя Преблаженную и непорочную Матерь Бога нашего, твоим рождеством явившую нам Свет Истинный: Царице неба и земли, ходатаице всех грешных: и прилежно молюся, ты сего раба твоего (или, сию рабу твою) от злобных духов обуреваемого покрый, заступи, и избави от всех бед и нужд, душевных и телесных, и от всех уз греховных свободи его (или, ю), и буди ему (или, ей) и нам заступница всесильными твоими молитвами.


Ко ангелом. 3.

Святии чиноначальницы, Михаиле, Гаврииле, Рафаиле, Урииле, со всеми умными небесными силами, серафимами, херувимами, престолами, господствиями, силами, властьми, началами, архангелами, и ангелами, молите Бога о рабе Своем.


Ко предтечи и пророком. 4.


Святый Иоанне пророче и предтече и крестителю Господень, яко имый дерзновение ко Владыце, со святыми богоотцы Иоакимом и Иосифом, Дивныя Богородицы обручником, с патриархами, пророками, и со всеми прежде закона и в законе Христа предвозвестившими праведными, моли Бога о рабе Своем.

 

 Ко святым апостолом, 5.

Святии славнии и всехвальнии апостоли, Петре и Павле, Андрее, Иакове, Иоанне, Филипе, Варфоломее, Фомо, Матфее, Иакове, Фаддее, Симоне, Матфие, Марко, Луко, Варнаво, со всеми прочими апостолами, семидесятьми же учениками, и всеми Христово Евангелие светло проповедовавшими, молите Бога о рабе Своем.


Ко мученикам, 6.

Святии добропобеднии мученицы, Стефане, Лаврентие, и Игнатие Богоносче, Георгие, Димитрие, Прокопие, Меркурие, Феодоре Тироне и Феодоре Стратилате, Киприане, Пантелеимоне, Космо и Дамиане, Кире, Иоанне, Ермолае, Новый Иоанне Сочавский. Чудотворнии российстии страстотерпцы, Борисе и Глебе, Антоние, Иоанне, Евстафие, в Вильне Христа ради страдавшии, преподобномученице Евстратие Печерский, и вси прочии святии мученицы, Христа ради пострадавшии, и увенчавшиися, со всеми святыми исповедниками, молите Бога о рабе Своем.

Ко святым учителем, 7.

Святии Василие Великий, Григорие Богослове, Иоанне Златоустый, Дионисие Ареопагите, Афанасие и Кирилле Александрийстии и Кирилле Иерусалимский, Григорие Нисский, Клименте, Епифание, Феофилакте, Иоанне Дамаскине, и вси святии учителие вселенстии, молите Бога о рабе Своем.

Ко святителем, 8.

Святый Николае Мирликийский, Грегорие Неокесарийский, Грирогие Арменский, Григорие Акрагантийский, Перте Антиохийский, Иоанне Милостивый, Андрее Критский, Спиридоне Тримуфийский, Петре, Алексие, Ионо, Филиппе, Ермогене Московстии, Киприане и Фотие, митрополити всея росии, Нифонте Новгородский, российстии чудотворцы, и вси святии иерарси, молите Бога о рабе Своем.

Ко святым царем и князем, 9.

Святый равноапостольный царю Константине, с великим российским князем Владимиром, Михаилом Черниговским, и Феодором Болярином его, и со всеми святыми цари и князи, молите Бога о рабе своем.

Ко преподобным, 10.

Преподобнии и богоноснии отцы наши, Павле Фивейский, Антоние Великий, Феодосие, Ефимие, Макарие, Афанасие Афонский, Савво Освященный, Марко ФраческийАфинский, Иларионе Великий, Феодоре Студийский и Феодоре Начертанный, Симионе, Данииле, и Алипие Столпницы, Алексие Человече Божий, Иоанне Кушниче, Симеоне, и Василие Христа ради юродивии, Кирилле Философе, учителю словенский, и преподобнии отцы наши Печерсткии Антоние, Феодосие, Николае Святоша, Никоне, Дамиане, Агапите, Алипие Врачеве, Григорие, Прохоре Чудотворнии, Афанасие, Лаврентие Затворницы, Иоанне, Никоне, и Исакие Многострадальнии, Пимине Многотерпеливый, Феодоре, и Василие Страстотерпцы, Иеремие, и Матфее Прозорливии, Моисею Угрине, девства ради пострадавый, Спиридоне, Никодиме Просфородейче, Еразме, Ефимие, Сергие Радонежский и Серафиме Саровский, Иове Почаевский, и вси святии девственницы, пустынницы, иноцы, в постническом подвизе Христови угодившии, молите Бога о рабе Своем.

Ко святым мученицам, и девам, 11.

Святыя Фекло, Екатерино, Варваро, Ефимие, Марино, Иустино, Анастасие, Ефросиние, Евгение, Ефросиние Полоцкая, и вся святыя девы, Христа ради пострадавшия, и преподобно пожившия, молите Бога о рабе Своем.

Ко святым женам, 12.

Святыя Анно, Елисавето, Марие Магдалино, царице Елено, великая княгине Ольга, Макрино, Мелание, Пелагие, и вся святыя мироносицы, мученицы, и преподобныя жены, Христови достойно послужившыя, молите Бога о рабе Своем.

Молитвами всех святых Твоих Господи, милостив буди нам и помилуй раба Своего (или, рабу Свою). Умилосердися Господи, и услыши нас грешных молящихся Тебе, и избави раба Своего (или, рабу Свою) от всякого зла.


Умилосердися, Творче и Искупителю наш, и очисти нас и сего раба Твоего (или, сию рабу Твою) от грехов и скверн душевных и телесных, и помилуй нас.
Умилосердися, Спасе и Избавителю наш, и отврати праведно движимый гнев Свой от нас и раба Твоего (или, от рабы Твоея), и от напрасныя и неначаемыя (внезапныя,) смерти избави, и от всех диавольских коварств, вскоре свободи его (или, ю).


Заступи, спаси, помилуй, и сохрани его (или, ю) и нас Боже Твоею благодатию, и от всякия скорби, гнева, беды, и нужды, и болезни душевныя, и телесныя, и от смерти вечныя милосердием Своим избави.


Помилуй нас Боже, по велицей милости Твоей, смиренно молимтися, услыши и помилуй раба Твоего (или, рабу Твою).


Воплощения ради Твоего, и пришествия в мир, Рождества же и Крещения, и поста святаго Твоего: Креста ради и Страдания, смерти же и погребения и Воскресения ради, и преславного Вознесения Твоего, Утешителя Духа, и Второго Страшного Твоего паки Пришествия, мы грешнии и недостойнии раби Твои, со умилением к Тебе припадающе молимся, милостивым Своим Оком призри на раба Твоего (или, рабу Твою) имярек, и простив ему (или, ей) вся согрешения вольная и невольная, виждь скорбь и озлобление его (или, ея), и облегчи е, и мир Свои дав ему (или, ей), человеколюбием и благостию Твоею соблюди его (или, ю), и благословив от всякого озлобления, насилия, мучения, наваждения же, и нападения диавольского изьяти и избавити того (или, тую) изволи. Ты бо Един еси вземляй грехи мира, и недуги и болезни наша понесый, и источник цельбам, и Врач душам, и телом нашим: и Тебе славу возсылаем со Безначальным Твоим Отцем, и со Пресвятым и Благим и Животворящим Твоим Духом, ныне и присно, и во веки веков.
Предстоящии же рекше: Аминь.


Заклинатель чтет со умилением псалом 90. Живый в помощи: Абие же предстоящии поют настоящий канон тихим гласом со умилением: аще ли ирмосы точию поют, тропари канона един от священных, или сам заклинатель во услышание и разумение предстоящих со умилением чтет.


(данный канон мы привели в самом начале данного чина. Продолжение в следующих обновлениях).

 


Перепечатал кирилицей Magnus Sabbat, 2018-2019 гг., специально для Teurgia.Org


Back to Top