Последование молебное

над домом, или местом очародеянным, и оплазняемым

(подвергающимся воздействию злых духов)

от злых мечтов (чарований, наваждений)

Пётр Могила

Священник предуготовлен сый по выше положенному уставу, повелев прежде всем в дому оном пребывающим грехов своих чинно исповедатися, и ден един поститеся, и милостыню по силе нищим сотворити, и прилежно Богу молитися. В день же, воньже хощет сие последование совершати, первее службу Божественную соверщив, приходит к очародеянному дому (или месту), и став на нем одеян в епитрахиль, аще не имать с собою священныя воды, творит абие малое августово (1) освящение, и фимиам благословит, начинает обычно:

Благословен Бог наш: и чтет: Царю небесный: Трисвятое: Отче наш: Господи помилую, 12. Слава, и ныне:

Приидите поклонимся: трижды.

Псалом 69: Боже, в помощь мою вонми: По псалме же глаголет молитву сию, рек:

Господу помолимся. Господи помилуй

Господи Иисусе Христе Боже наш, Превечный и Сопресносущный, Безначального Отца Живаго Бога Сыне, безначальных Его недр не отлучаяся с небесе сошедый, и Человек непреложно бывый, яко да человека от прелести и мучительства диаволя свободивый, себе присвоиши: и яко да бесовская вся злодеяния испраздниши, святым своим учеником и апостолом власть дал еси, еже наступати на змия и скорпия, и на всю силу вражию: Тебе ныне недостойнии раби Твои прилежно молим: призри милостивно на дом сей (или, на место сие), злокознием лукавых человек, и волшебным их обаванием очародеяным (или, очародеяное), лукавством же диаволим оплазненым и обуреваемым (или, оплазняемое и обуреваемое), и всемощною Твоею силою человеколюбно вся сия раждени, и в ничтоже обрати, яко да безпакостно от них вернии раби Твои зде обитающии и скоти их, во славу Твою пребудут. Твое бо есть еже миловати и спасати нас, Боже наш, и Тебе славу возсылаем, со Безначальным Твоим Отцем, и со Пресвятым, и Преблагим, и Животворящим Твоим Духом, ныне и присно, и во веки веков. Аминь.

Абие же взем кадильницу, и вложив в ню фимиам благословенный, кадит весь дом или место глаголя сие:

Да воскреснет Бог и расточатся врази Его, и да бежат от лица Его ненавидящии Его. Яко исчезает дым, да исчезнут: во Имя Отца и Сына и Святаго Духа. Аминь.

Посем абие глаголет: Премудрость, прости, услышим святое Евангелие. Мир всем. Предстоящии: И духови твоему. Священник: От Иоанна святаго Евангелия чтение. Предстоящии: Слава Тебе, Господи, слава Тебе. Священник: вонмем.

И чтет Евангелие сие глава 1, зачало 1.

В начале бе Слово, и Слово бе к Богу, и Бог бе Слово. Сей бе искони к Богу. Вся тем быша, и без Него ничтоже бысть, еже бысть. В Том живот бе, и живот бе Свет человеком: И Свет во тьме светится, и тьма его не обьят. Бысть человек послан от Бога, имя ему Иоанн. Сей прииде во свидетельство, да свидетельствует о Свете, да вси веру имуть ему. Не бе той Свет: но да свидетельствует о Свете. Бе Свет истинный, иже просвещает всякого человека градущаго в мир. В мире бе, и мир тем бысть, и мир Его не позна. Во своя прииде, и свои Его не прияша. Елицы же прияша Его, даде им область, чадом Божиим быти, верующим во Имя Его: Иже не от крове, ни от похоти плотския, ни от похоти мужеския, но от Бога рожишася. И Слово плоть бысть, и вселися в ны: и видехом славу Его, славу яко Единородного от Отца, исполнь благодати и истины. Иоанн свидетельствует о Нем, и воззва, глаголя: Сей бе, егоже рех, иже по мне грядый, предо мною бысть: яко первее мене бе. И от исполнения Его мы вси прияхом, и благодать возблагодать. Яко закон Моисеом дан бысть: благодать же и Истина Иисус Христом бысть.

Предстоящии: Слава Тебе, Господи, слава Тебе.

По Евангелии же чтет псалом 90: Живый в помощи Вышняго:

И по псалме рек: Господу помолимся. Господи помилуй.

И чтет молитву сию:

Господи Боже спасения нашего, Сыне Бога Живаго, на херувимех носимый, превышесый всякого начала, и власти, и силы, и господства: Ты еси Велий и страшный над всеми сущими окрест Тебе: Ты еси поставивый небо, яко камару(свод, шатёр): Ты еси сотворивый землю в крепости Твоей, и исправивый (устроивший) вселенную в премудрости Твоей: трясый поднебесную от оснований: столпы же ея неподвижны: глаголяй солнцу, и не возсияет, звезды же запечатлеяй: запрещаяй морю, и изсущаяй е: Егоже ярость тает начала и власти, и камение сотрясошася от Тебе. Врата медная стерл еси, и вереи железныя сломил еси: крепкаго связал еси, и сосуды его раздал еси: мучителя Крестом Твоим низложил еси, и змия удицею Вочеловечения Твоего привлекл еси, и узами мрака в тартаре посадив связал еси. Сам убо Господи, утверждение на Тя надежду возлагающих, отступити сотвори, отжени, и в бегство претвори всякое диавольское действо, и всякое сатанинское нахождение, всякий навет сопротивныя и належащия (в оригенале: надлежащия) силы от крова сего (или, места сего), и от одержимых от него, и от обходящих под ним, знамение страшныя на демонов победы Креста Твоего носящих, и призывающих Имя Твое Благое. Ей Господи, легеона демонов отгнавый, и глухому и немому демону, и нечистому духу удержавшемуся, от человека изыти, и исходу невозвратну быти повелевый: все ополчение невидимых врагов наших потребивый, верныя же и познавшыя Тебе умудривый: се даю вам власть, еже попрати верху змиев и скорпиев, и на всю силу вражию. Сам Владыко вышши всякого вреда и искушения вся сущия в дому сем (или, пребывающим на месте сем) сохрани, избавляя их от страха нощнаго, и стрелы летящия во дни, от вещи во тьме преходящия, от сряща и демона полуденнаго: да Твои раби, Твоя рабыни, и младенцы, Твоея наслаждающеся помощи, и ангельским воинством храними, яко един вси во единомыслии верно поют: Господь мне помощник, и не убоюся, что сотворит мне человек; и паки, не убоюся зла, яко Ты со мною еси. Яко Ты еси Боже, Утверждение мое, Крепкий Обладатель, Князь Мира, Отец будущаго века, и Царство Твое, Царство вечное: и Тебе Единаго есть Царство, и Сила, и Слава, со Отцем, и Святым Духом, ныне и присно, и во веки веков. Аминь.

Посем чтет псалом 67: Да воскреснет Бог и расточатся врази Его:

И заклинание сие:

Заклинаю вас, вселукавии злоначальницы, проклятии мерзкии бесове, яже аще кто есте, и елико вам есть, иже обованиями, чародействы же злотворными деянии отдавшаго себе вам лукавого человека приведени бывше, дом сей (или, место сие) обуреваете, и злыми мечты и оплазнствы своими, живущих в нем (или, на нем) оскорбляете и озлобляете, и о всесильном и всемощном Имени Единого Вседержителя Бога, в Троице Святой славимого, Отца, и Сына, и Святаго Духа, и в силе Честнаго и Животворящаго Креста, и всех Спасительных Страстей, и Животворныя Смерти Господа Бога и Спаса нашего Иисуса Христа, еюже вся темная ваша власть, и лютое над человеки, и всеми созданиями Божиими мучительство испразднено и оничтоженно есть, крепко повелеваю, яко да отныне со всеми волшебствы обаваниями и чародействы вашими от дому (или, места) сего скоро отбежите, и ктому никакоже николиже вспять возвратитеся. Ничтоже убо медлите, о проклятии низверженницы, но обратитеся вспять, и скоро оттуду со всеми злодеянии вашими далече отбежите, и дадите место Божией Силе, Своим неисчетным милосердием, и благодатию разрушающей злодеяния ваша. Да запретит вам Перст Божий фараоновых волхвов обования и волшебная мечтания бездельны (бессильны) сотворивый, и тех мучивый. Да запретит вам Той, Егоже Сила запрещением Павла апостола немощную вашего лукавства силу во Елиме волхве, всякия лести и злобы исполненном, вразе же всякия правды, и диавольском сыне, имже вы многих повреждасте, и пути Господня правыя развращати потщастеся, обличи, посрами и испраздни. Да запретит вам Той, о Егоже Имени Павла апостола запрещением духа пытливаго от отроковицы оныя изгна, яже волшебством своим тяжание (стяжание, преобретение, доход) велие даяше господем своим. И якоже на святую Иустину, Креста знамением и на нем распятого Христа Бога нашего силою огражденную, обавающу, и вас убеждающу Киприану, ничтоже успесте, но страхом и трепетом одержими отбегосте: сице и ныне да нападет на вас и обымет вы ужас, трепет, и страх Бога Вседержителя, Отца, и Сына, и Святаго Духа, Хотящаго вас низринути во огнь вечный, и безконечно в нем мучити. Аминь.

Взем же священную воду, кропит весь дом, или место, глаголя: Да отбегут и отступят от дому (или, места) сего, вся лукавая диавольская обавания, чародеяния, и волшебная действа, окроплением воды сея священныя, и в ничтоже да обратится и исчезнут, во Имя Отца, и Сына, и Святаго Духа. Аминь.
По сих творит обычный дневный отпуст и отходит во своя си.

Освящение воды, совершаемое по чину, бываемому в праздник Происхождения (изнесения) честных древ Животворящего Креста Господня 1(14) августа (см. Минею, 1 августа).

Перепечатка и оформления Teurgia.org, 2020 год